Ledled y DU, mae ein pryfed peillio gwerthfawr yn dirywio o ganlyniad i ddirywiad mewn cynefinoedd sy'n llawn blodau gwyllt, newidiadau yn y ffordd yr ydym yn rheoli'r tir a phlaladdwyr.

Mae hyn yn golygu ei bod yn bwysicach fyth ein bod yn defnyddio ein mannau gwyrdd yn y ddinas i'w helpu i ffynnu.

Ers 2015, mae Buglife wedi bod yn gweithio gyda chymunedau lleol mewn 12 o  ddinasoedd ar y prosiect Urban Buzz. Rydyn ni wedi creu dolydd blodau gwyllt, gerddi ffurfiol sy'n gyfeillgar i chwilod, cloddiau gwenyn ar gyfer nythu, cysgodfeydd beiciau byw, perllannau traddodiadol, gerddi perlysiau a llawer mwy.

Diolch i gymorth mwy na 11,000 o wirfoddolwyr, rydyn ni wedi cynhyrchu 973 o “Fannau Suon” ac wedi gwella mwy na 274 hectar i bryfed peillio.

Dim ond y dechrau yw'r prosiect yma. Gall unrhyw un helpu hyd yn oed mewn gardd o faint y stamp lleiaf.

Dyma gynghorion gorau Buglife ar gyfer gwneud eich gardd yn gyfeillgar i bryfed:

1. Tyfwch weirgloddiau bychain

Ychwanegwch rai blodau gwyllt at eich lawnt a pheidiwch â defnyddio’r peiriant torri gwair am yr haf. Gall hyd yn oed feillion, dant y llew a llygaid y dydd fod yn fagnet i wenyn a gloÿnnod byw.

2. Adeiladwch bwll bach

Crëwch bwll bywyd gwyllt bach, bas - mae angen diod ar bryfed hofran hyd yn oed. Beth am ychwanegu rhyw fintys dŵr blodeuol?

Cewch rywfaint o gyngor ar greu pyllau bach ar wefan Buglife website.

3. Creu cartref i’r gwenyn

Prynwch westy gwenyn, neu crëwch un eich hun, gan ddefnyddio ffyn bambŵ wedi'u bwndelu neu goesau cyrs mewn lleoliad heulog. Mae gan y gwestai gwenyn gorau lawer o dyllau sy'n 4 - 10mm o led.

4. Plannwch ardd berlysiau

Mae saets, mintys, rhosmari a theim yn boblogaidd iawn gyda phryfed peillio ac yn eich cegin eich hun hefyd! Bydd unrhyw hen blannwr, cynhwysydd neu sinc yn gwneud y tro - neu rhai potiau ar eich ffenestr.

5. Peidiwch â defnyddio cemegau a phlaladdwyr

Efallai eich bod yn ceisio cadw eich blodau yn edrych yn fwy iach ond mae plaladdwyr yn fygythiad enfawr i'n pryfed peillio. Rhowch gynnig ar syniadau rheoli plâu Buglife.

Rhagor o wybodaeth

Mae’r prosiect Urban Buzz gan Buglife wedi derbyn cefnogaeth gan y Loteri Genedlaethol ar gyfer ei waith yng Nghaerdydd, Birmingham, Leeds a Chaerlŷr. Cewch rhagor o wybodaeth ar wefan Buglife.