Cysylltiadau Mawndiroedd Coll yn brosiect partneriaeth sy'n cael ei arwain gan Gyngor Castell-nedd Port Talbot, a ariennir drwy ein Cysylltiadau Tirwedd: Menter Strategol.
Gan weithio ar draws Cymoedd Afan, Castell-nedd, Cynon Uchaf a'r Rhondda, bydd y prosiect yn adfer ac yn gwella mawndiroedd, rhostiroedd a choetiroedd.
Dros dair blynedd, bydd gwaith cadwraeth yn digwydd ar draws 16 safle, gan helpu i wella cynefinoedd ar gyfer bywyd gwyllt a chryfhau cysylltiadau rhwng ardaloedd naturiol pwysig. Bydd y prosiect hefyd yn cefnogi gwytnwch hinsawdd trwy adfer mawndir a gwella cynefinoedd.
Ochr yn ochr â'r gwaith amgylcheddol, bydd pobl leol yn cysylltu â natur drwy gyfleoedd gwirfoddoli, dysgu yn yr awyr agored, gweithgareddau lles, hyfforddiant sgiliau treftadaeth, digwyddiadau cyhoeddus a phrosiectau creadigol.
Bydd adnoddau digidol, gan gynnwys ap fforiwr, profiadau realiti rhithwir a chyfres podlediad, yn rhannu treftadaeth naturiol a diwylliannol yr ardal gyda chynulleidfaoedd ehangach. Bydd llwybrau cerdded newydd a nodweddion dehongli hefyd yn helpu mwy o bobl i archwilio a mwynhau'r tirweddau ucheldirol hyn.
Trwy ddod â chymunedau, sefydliadau a chynefinoedd at ei gilydd, nod y prosiect yw creu manteision parhaol i bobl a natur ar draws Cymoedd De Cymru.
Meddai Richard Pulman, Rheolwr Prosiect, "Mae Cysylltiadau Mawndiroedd Coll yn helpu pobl i ailddarganfod y tirweddau, y dreftadaeth a'r straeon ar garreg eu drws. Dros y blynyddoedd nesaf, byddwn yn adfer a gwella bron 870 hectar o gynefinoedd gwerthfawr wrth greu miloedd o gyfleoedd i bobl wirfoddoli, dysgu sgiliau newydd, gwella eu lles a chysylltu â'u treftadaeth leol. Mae ein nod yn syml: gadael y dirwedd a'n cymunedau mewn lle gwell ar gyfer cenedlaethau'r dyfodol."
